閒话上海方言之——讲讲一嗰“洋”字
2019-10-25 21:41阅读：
勒拉2014年01月31日星期五夜里向，笔者写过一篇文章名叫《闲话上海之——话“洋”字》（上海方言文章），里向所讲呃内容就跟“洋”字有关呃各类方言土语，总觉着写的覅是最好，决定修改一下。
笔者去查阅了上海滩哴向呃历史，上海迭座城市勒拉1843年11月17日开埠了，伊是根据《南京条约》跟《五口通商章程》呃规定，上海就勒拉迭嗰一天正式开埠。从而造就了上海迭座城市，既是一座五方杂处呃城市，又是最早开放呃城市之一，因此伊最易接受、吸收外来文化跟多元文化，城市文化也是兼容并蓄呃，勒辣老底子呃上海文化当中，上海人顶顶欢喜讲呃词语之一，就是“洋”字了。不过，伴随着改革开放呃脚步不断前进加大，加之国家又要求每嗰省市统一去讲普通閒话，所以有些上海閒话讲呃人就变得邪气少了，甚至于覅去讲了。其中之一就是一嗰“洋”字，有可能勒拉老一辈上海人，至少是爷爷辈呃老上海人还会的去讲讲伊，年轻人就覅大去讲了。
勒辣老底子呃上海滩哴向，假使有一嗰大人，或者一大群大人，看到有一嗰小囡，伊嗰马相跟样子长得交关好看，大眼睛双眼皮炯炯有神，面孔看上去活脱脱像一嗰外
国小囡，覅管迭嗰小囡，是一嗰男小囡，还是一嗰女小囡，上海人统统都欢喜称伊为“洋囡囡”。
勒辣老底子呃上海滩哴向，用轨道煤气或煤气呃人家，绝对是属于风毛菱角少之又少哦，有可能只有一些住勒拉花园洋房呃大人家才会的去用。绝大多数呃普通人家只好去用煤球炉子，经济条件稍许好一眼眼呃人家，会得去使用煤油炉子，某些家庭人数较多呃人家，也同样会的去配备一只煤油炉子，以防备不时之需去使用。伊嗰辰光交交关关呃普通人家是覅的啥呃打火机呃，生炉子所要去用到呃么事就是“火柴”了，上海人覅是称伊为“自来火”，就是称伊为“洋火”。“洋火”呃使用频率要远远较比“自来火”来的多、来得频繁啊，之所以上海人欢喜把“火柴”称之为“洋火”，就是因为“洋火”是由外国人发明呃，是外国人从外国引进到中国、引进到上海来呃！
勒辣老底子呃上海滩哴向，一些做各类大小生意呃商贩们，顶顶欢喜去做呃一桩事体就是去——“斩人家葱头”，利用信息覅对称，客户对市场行情又覅是顶顶了解，打一嗰时间差跟剪刀差，低价去喫进各类商品，再高价翻倍去卖给客户。“斩人家葱头”迭句閒话呃意思就是讲，对于那些覅大领行情与市面呃人，只要伊来买各类么事，就可以去狠狠交敲人家一记竹杠、骗人家一眼铜钿哦，拿低档物品高价卖把别人家。还有一句閒话叫：“伊拉是专门做斩洋葱头呃生意！”迭句閒话呃意思是讲，各类商贩们勒辣做生意呃全过程当中，专门欢喜去敲一些外国佬呃竹杠、骗外国佬手里向呃铜钿，只因为外国人初到中国跟上海滩，对于中国呃各类情况、行情、市面以及各类人事物情领覅大清爽覅领行情，所以就邪气容易对伊拉下手，走过路过就覅肯去错过，就要去狠狠较斩伊拉一记。不过，外国佬既覅是戆大，也覅可能一直是只洋葱头让商贩们去斩啊，辰光一长，迭些外国佬们，门槛变得越来越精了，对于中国呃各类人事物情以及情况跟行情，了解的涩勒斯清爽，迭嗰辰光再要想去狠狠较敲外国佬呃一记竹杠，骗骗伊拉一眼眼铜钿，赚一笔铜钿银子，就覅像过去噶么便当了！
勒辣老底子呃上海滩哴向，一些混迹于江湖（职场）中呃上海男人，或者勒辣江湖（职场）中“讨生活”呃上海男人，尽管绝大多数人是一嗰极其普通呃职员，伊拉必需要去准备好一两套出客呃行头——“洋装”，哪怕迭嗰男人经济条件邪气推扳，至少要去准备好一套“洋装”，所谓呃“洋装”其实就是“西装”。假使讲，所穿呃迭件西装有明显凸出呃破损之处，又邪气容易畀别人家去发觉呃閒话，上海人顶顶欢喜去讲伊呃一句閒话就是：“迭嗰人真是一嗰洋装瘪三嘛！”还有就是，上海人发明了名叫“假领头”呃衣裳，“假领头”普通閒话又被称之为“节约领”，勒拉掰搿辰光上海人穿西装还有一嗰规定，一定要去戴一条领带，假使是穿西装呃人是衬着假领头戴着领带，就算碰到天气邪气炎热呃日脚，都覅好把外套脱了，脱了外套，上海人就会的讲伊：“迭呃人赤膊带领带，真是一嗰洋装瘪三嘛！”……会畀别人家看覅起，还要被议论纷纷说三道四一番！
勒辣老底子上海滩哴向，普通人家勒拉俗常生活当中，对于钞票呃数量单位是覅大欢喜去讲“元”呃，交关欢喜去讲一嗰“块”字，覅管去商店里向买各类么事，还是到小菜场去买小菜问问价钿、讨价还价，讲几元1斤，就算是还价成功了，营业员啊会勒拉背后讲伊：“迭嗰人标标准准是一嗰洋盘，真是有眼阿乡兮兮（滴答）呃，伊今朝仔肯定是从十六铺码头刚刚上来！”……上海人还发明了一嗰词语就是“洋钿”，自从发明了“洋钿”迭呃词语以后，勒辣讲“块”呃辰光，后头眼般数要去增加一嗰“洋钿”迭嗰后缀词语，譬方讲：一块洋钿、五块洋钿、十块洋钿……就算是讲到了角分，最后眼般数同样要去加“洋钿”迭两嗰字，还譬方讲：五分洋钿一把葱，一角洋钿三块老姜……勒拉老底子，从1955年到1987年之间，国家发行呃铜钿，最高票面金额是十块，自从诞生了50块跟100块面值以后，就覅加“洋钿”迭两嗰字了，因为要是去加了“洋钿”迭两嗰字，用上海閒话读起来，就显得覅够流畅流利了，所以就覅好去用伊了。尽管“洋钿”迭嗰词语，现在用得比较少了，哪怕是正宗上海人啊覅大去使用、去讲了，但是，偶尔听到有人还勒辣讲，还是感觉到蛮亲切呃。
正因为上海是最早开放、最早接受外来文化跟西方文化呃城市之一，所以勒辣俗常生活当中，覅管啥呃人、啊覅管伊具体是做啥呃事体，都比较欢喜跟“洋”字搭界、跟“洋”字沾亲带故做亲眷。
譬方讲：上海人交关欢喜把土豆或马铃薯，称之为“洋山芋”；充满空气或者某些其他气体呃各类气球，称之为“洋泡泡”；连讲到“蜡烛”迭两嗰字，啊要勒辣“蜡烛”前头去添加一嗰“洋”字，称之为“洋蜡烛”，还有一句上海俗语讲得好：“侬迭呃人真是一嗰洋蜡烛，覅点覅亮！”；清朝后期至解放初期，吾伲所使用呃各种银元，就有的光绪元宝、袁大头、孙大头跟墨西哥鹰元，上海人一律称之为“银洋钿”；就连跟吾伲隔海相望呃邻国——日本，上海人会去称伊拉国家里向呃人，覅是叫“东洋人”，就是叫“东洋鬼子”……
实际哴向，关于“洋”字呃词语跟故事，还是有的交交关关多呃，一时头哴绝对是讲覅光呃，等到以后再讲，笔者会的继续去写！
【备注：文章为作者原创；各类贺友直画作图片均来源于网络上；感谢原创图片。】
杜老倌侠客居（陆伟）修改于2019年10月25日星期五晚上
