新浪博客

黄松糕白松糕  苏州一块糕之7

2015-11-21 13:41阅读：

http://blog.sina.cn/dpool/blog/u/1630411984

黄松糕白松糕
从重阳日过后开始，写仔勿少苏州格'糕'，意犹'味'尽，索脚弄个系列，慢慢交，一样一样嚼下去。
苏州糕团做工细致，花样繁多。
以前，糕团店早浪卖格糕团当中，做工最简单丶价钿最便宜格，就是只要三分洋钿就好买一块充饥格黄松糕白松糕。
黄松糕白松糕，颜色不一样，味道呒啥大区别。
不过，勿好省忒'黄'勒'白'格两个字。单叫'松糕'，甩边！就包括用米粉蒸出来勿
揉和格丶多层格丶加馅料格其他各种各样松糕哉。
黄松糕白松糕，勿加啥馅料果仁，就是用不同颜色格糖水，黄糖或白糖水修粉(困难辰光，大概匣用色素搭糖精水)，清打清，上大笼屉蒸出来。
出笼后，不揉褥，直接分条切块卖。
叫名头松糕，就要糯软松爽，而松糕当中，也只有黄松糕白松糕，粒子粗，吃勒浪最松软爽口。
馒头松软，靠酵头。
黄松糕白松糕松软，主要靠修粉本事。
勿侪用糯米粉。镶几化粳米粉，洒几化水，修成几化粗细格粉粒，上笼蒸几化辰光，就看糕团师傅手里格功夫。
再便宜，匣勿好搭浆。好坏，侪出勒吃客嘴里。
蒸出来的糕，板要看上去颗粒搭空，透气干松，入口依然软糯，才灵。
绝对勿好烂塌塌，一团糟。
小辰光，欢喜吃黄松糕白松糕，勿单单为便宜，匣就为仔俚不粘牙齿，吃勒海爽。
有得吃格种松糕，最多格日脚，不勒城里，倒是浪太仓乡下插队辰光。
太仓农村，过年蒸糕，勿舂匣勿揉，勿加啥馅料，蒸出来就象城里格黄松糕白松糕。
新谷一收场，稍微空点，乡下就有人家蒸糕哉。
凑勒格种辰光走人家，挨家挨户打秋风，就有刚出笼格热吹潽烫格糕吃。
甜淡松软，家家勿一样，吃仔还要批一泡。
吃饱转来，夜饭省忒。匣是格辰光插队知青农忙之后苦中一乐。
太仓乡下蒸糕，要蒸勿勿少少。现吃勿多，大都趁热切成半寸见方丶三寸长短格条状。
天好摊勒芦簾架浪，晾干，再装勒甏里。从过年一直要搭吃到麦收。
晒过格松糕，绷綳硬。
早浪放点勒粥镬子浪回蒸，搭点吃吃，田里做生活熬饥。
还有格，索脚塞两块勒袋袋里，带到田里，'哼哼'(太仓方言，指田间休息)辰光啃啃。
不过，要牙齿好。
现下再饿再香，格种硬糕，阿勿敢啃哉。
覅，糕么朆啃下来一滴滴，剩勒浪呒畀几颗牙齿侪蹩忒仔。
囥到黄梅，甏里格硬糕匣要发霉，厾忒勿舍得，汰忒点绿毛霉花，蒸蒸再吃。
吃甏里生绿毛格硬糕，匣是呒说法。
天下世界，随便哪哼，吃饱肚皮才是硬道理。
嘿嘿！格辰光，呒人再会讲究，吃口阿糯软松爽哉。
黄松糕白松糕，总归现蒸现卖格最好吃。
就是现在糕团店里看勿大见，价钿便宜，呒人肯做。
买得着匣是冷格，绷绷硬象块砖头，人匣掷得煞。
只好睏梦头里想想，搨几笔勒该搭嚼嚼。

我的更多文章

下载客户端阅读体验更佳

APP专享