完騷後預備拍劇同電影 林峯年底有事宣佈
2016-05-02 20:22阅读：
2-5-2016
蘋果即時
【同千語BB結婚？】年底有事宣佈 林峯話未有咁快 (視頻)
http://hk.apple.nextmedia.com/enews/realtime/20160502/55053604
一連三場嘅林峯演唱會終於完成，林峯話最想飲汽水。
林峯於首場演唱會傷手流血，手上傷痕明顯可見。
林峯話冇聽聞話自己演唱會，被對面岸嘅黎明演唱會搶風頭。
林峯噚晚喺紅館開嘅演唱會已經去到尾聲喇!去捧場睇騷嘅朋友就有吳卓羲、鍾舒漫、黃百鳴、馬天佑、林夏薇老公、林峯細佬等等。頭場時整親手指流血嘅林峯，雖然冇再受傷，不過依然有啲蝦碌事情發生，好似本來尾中段有part抽高升降台，接近坐山頂位嘅觀眾，作近距離接觸，跟住佢再吊威也，好似空中飛人咁，不過噚晚就冇咗呢part。
演唱會重點當然係林峯除衫，觀眾繼續尖叫，林峯話：「今次表演準備充足，係咁多次演唱會做得最足一次，不過亦係最緊張嘅一次，因為想做到最好，完咗演唱會之後，會拍劇同拍電影，年底開始準備巡唱。」講完呢番冇乜特別嘅說話，觀眾依然係繼續大叫，搞到林峯都有啲眼濕濕。
完騷之後，林峯出席慶功宴，講到佢整親手指流血，又話撼親個頭，林峯澄清冇撼親頭：「冇，完全冇，我有睇到報道，其實我只係心急落台換衫，個吓係關閘嘅聲，唔係撞頭嘅聲，我完全冇接觸過個閘。」記者要求佢騷隻受傷手指出嚟睇吓，但佢就唔肯，猛話：「冇事，冇事啦!貼咗嘢!表演到就得。」
林峯喺今次個唱入面，除衫騷肌，見到佢落咗好多心機去操腹肌，又要跟住餐單去食，每日食嚟食去都係得嗰幾樣嘢，雖然辛苦，不過就因為咁減咗20磅，兼有個好body，不過苦完梗要食好啲，佢話第一時間係好想飲杯汽水先：「不過都會盡量keep番個體型，，下年都要巡唱，但就唔會咁戒到好清。」
講到今次多蝦碌事，佢解決番點解冇咗吊威也嗰part：「因為係技術上問題，個威也摩打壞咗，所以唔做得，原本好想倒吊唱歌，不過心願都達成咗，可以同山頂觀眾近矩離接觸。」
有網民話林峯唔好彩，開個唱撞正黎明喺對面海又開騷，搶走晒佢嘅風頭，林峯就話：「冇聽過呢個傳聞，今次開騷好多朋友都嚟支持我，有啲朋友都冇飛。每個觀眾都有自己鍾意嘅偶像，而每個artist都有唔同層面嘅支持者。」
另外，佢又話年底會有樣好突破嘅事要發生，不過要到時至可以宣佈。問佢係咪要同吳千語BB結婚?林峯即笑晒咁話：「唔係，未有咁快，總之一定有驚喜。」千語BB睇完個騷有咩評價?林峯話：「佢叫我騷多啲畀觀眾睇。」嘩!估唔到千語BB咁大方，林峯笑話：「應該嘅!」
林峯話完騷後就要預備拍劇同電影。
吳卓羲噚晚到場支持老友。
黃百鳴
