封闭勒了屋里厢有眼闲，本来是有辰光可以写写弄弄的，结果却是每日天交关辰光是捧了手机看微信，生怕错过小区里做核酸、几只羊的通告，错过楼群里拼团抢购的信息，还要勒盖各只群里穿来穿去，了解、转发各种有意思的事体。
前几天政府配送了一趟蔬菜。因为蔬菜来之不易，香莴笋的叶子也舍勿得掼忒，当日夜头有邻居用香莴笋叶烧了一锅咸酸饭晒了群里厢。
咸酸饭，就是普通话里厢的菜饭，是上海的一个传统名吃。上海人家烧咸酸饭常庄用的是青菜，香莴笋叶也是用了蛮多的。早沿条件比较艰苦的辰光，上海人家烧咸酸饭就只放蔬菜的，是名副其实的“菜饭”，比较好眼的是再用猪油拌拌。后首来屋里条件好起来后，咸酸饭里厢就加了咸肉，所以又叫做咸肉菜饭。现在上海勿少餐厅里也有咸酸饭，但多数是叫菜饭的，里厢的内容就丰富多了。
我教学生讲上海闲话，不管是不是上海人，小囡差不多侪勿晓得咸酸饭是啥么事。外加勿管是新上海人，还是勿讲上海闲话的小上海人，咸酸饭的“咸”上海话哪能讲还往往讲勿大来。
也有人讲，咸酸饭是上海本地人的叫法。迭个讲法一眼也勿错。上海本地人是一向烧咸酸饭的，而且咸酸饭只有用上海本地的乡下大灶头烧出来的才是最最好吃最最正宗的。进了城里厢的咸酸饭已经是上海人的改良版了，用了煤炉、煤气灶或电饭煲烧出来的咸酸饭远远叫呒么乡下大灶头烧出来的香，外加还呒么大灶头烧饭特有的又香又脆的镬焦。
有人一直勒盖担忧，上海话会不会失传。其实，时代勒嗨发展，旧的勿去新的勿来，搿也是一种趋势，咸酸饭勿叫叫菜饭或咸肉菜饭也未尝不可。必过，搭子现在的小囡讲讲老上海的么事，讲讲老法的上海人当中一眼么事的叫法也是蛮有意思的。类似咸酸饭的，老底子吃的么事还有茶叶茶、茶淘饭、包脚布、老虎脚爪、糖糕、调（条）头糕、绞乱棒、荷
兰水、炒时件、单档双档老啥；用的么事有司别灵、水门汀、凡尔、回丝、捻凿、黄鱼车、白相干等等。勿晓得大家是不是侪晓得迭眼名词指的是啥东西伐？特别还有脚馒头、饭泡粥，搿两只老鬼三，新上海人小上海人阿晓得是啥么事伐？
我已经有一腔呒么写上海话了，今朝刚好是《学上海话》版主张林龙老师过世一个月，我写上海话正是勒嗨张林龙老师的鼓励下开始的，新写迭篇以表纪念。只是故人已去，新的上海话也勿再有张林龙老师的修改、指正搭子上海话配音了。
